


Buailfimid le amhránaithe sean-nóis a labhróidh le Antaine Ó Faracháin faoi na hamhráin is fearr leo, faoin áit a bhfuaireadar iad agus an fáth go dtaitníonn siad leo.
Is í Caitlín Ní Chualáin a bheidh ar chlár na seachtaine seo.
Labhraíonn Caitlín le Antaine faoin a suim sna hamhráin agus faoi na hamhráin is fearr léi...
1. Línseach Bhearna
2. Máire Inis Toirc
3. Na Buachaillí Bána
4. Neilí Bhán

Ag dul ó Chasla aniar is mé lag tuirseach de mo thriall,
I mBearna 'sea d'iarr mé áras.
Fuaireas sin gan mhoill in aice leis an gcoill,
San áit a bhfásann cnó agus áirní.
Ó, déanfar droichead óir ar Pholl an Oistre fós,
Is beidh airgead i stór an Mháistir,
Arm seasta i gcóir, ag tíocht ag déanamh spóirt,
Is ag amharc ar an ógfhear álainn.
Ó fíon is punch go leor a bhéas eatrainn ar bord,
Sláinte fear dhá ól trí ráithe.
Siúd séan ar an oidhre óg nach scarfaidh leis go deo,
Is beidh bua Chonnachta ag Línseach Bhearna.
Tá loingis ag an Línseach a rinneadh ins an tír seo
De choillte is de chrainnte a d'fhás dhó.
Is gléasfar cabhlach cruinn i bhfoirm cheart 'sa gcaoi
Is beidh a ngunnaí ar a dtaobh ag lámhach.
Nach mór an spóirt sa tír nuair a bhéas an chabhlacht linn
Beidh a cuid slata seoil faoi éadaí bána
Anois tá an chabhlacht cruinn, is tiocfaidh anall an Rí
Is beidh sé ar chuairt mhíosa i mBearna.

