MÁIRÍN STAUNTON

Tá pabhsae gléigeal ar bhruach na céibhe
Agus bhuail sí Deirdre le breáichte is gnaoi,
Is dá n-abrainn Héilin an bhanríon Ghréagach
Ar thit na céadta dá barr sa Traí.
Tá gile is lasadh inti do réir a chéile,
Is binne a béilín ná cuach ar chraobh,
Is a méin ná a tréithe ní bhfaighfeá in aon bhean
Ó d'éag an péarla a bhí i mBaile Uí Laí.

Dá bhfeicfeá an spéirbhean is í gafa gléasta,
Lá breá gréine sa tsráid, is í ag siúl,
Solas lasta ina brollach gléigeal
a bhéarfadh léargas do dhall gan súil.
Tá grá na gcéadta i gclár a héadain,
Is geall a féachaint le réalt an luain,
Is dá mbeadh sí in éifeacht le linn na ndéithe,
Ní suas do Véineas a bhéarfaí an t-úll.

Tá a folt ag casadh léi síos go glúine,
ag fí is ag lúbadh go béal a bróig,
Ina dhualta scartha, is é chomh glas le drúchta,
Is ina thrilsí ag scuabadh ina diaidh sa ród.
Siúd í an chúileann is gile múinte
Dár oscail súil is dhá maireann beo,
Dá mba liomsa dúiche nó stát Lord Lucan
Dar brí mo chúise ba liomsa an tseoid.