Cuirfear tús leis an dara sraith FEIRM FACTOR, 10 gclár ar TG4 ar an Déardaoin 14 Eanáir 2010.
Craoladh an chéad shraith bliain ó shin, sraith nuálaíoch inar cuireadh dáréag feirmeoir ó chúlraí éagsúla in iomaíocht le chéile féachaint cé aige/aici a bhí an raon scileanna, acmhainn ghnó agus seasmhacht choirp agus intinne chun an duais mhór a bhuachan.
Is í Maura Derrane an láithreoir agus tig léi a bheith báúil nó dian de réir mar a oireann don ócáid. Is iad Alan Dukes, iar Aire Talmhaíochta agus eacnamaí agus Seán Ó Lionáird, feirmeoir as Corcaigh, na moltóirí.
PADRAIC SEOIGHE - PJ
As Baile Átha Bui i gCo. na Mí don fhear óg seo, 21 bliain d'aois agus tá taithí fhairsing aige cheana féin ar fheirmeoireacht mhairteola, dhéiríochta, churadóireachta agus eile, sa mbaile agus i gcéin. Bhain sé céim amach le gairid agus is mór a shuim i gcúrsaí spóirt. Imreoir maith foirne a bheidh ag foghlaim leis agus ag dul i neart ó thasc go tasc.
