2005 - JACKIE DALY

Sa bhliain 2005 bronnadh Gradam Ceoil TG4 ar Jackie Daly, an chéad bhoscadóir a fuair an Gradam. Tá go leor déanta ag Jackie chun ceol Shliabh Luachra a chur chun cinn taobh amuigh den dúthaigh féin trína oirfideadh agus a stíl chroíúil spleodrach féin agus tríd an mbaint a bhí aige le mór-cheoltóirí agus grúpaí na linne seo.

Is i gCeann Toirc i dtuaisceart Chorcaí a rugadh é agus thosaigh sé ag foghlaim agus ag bailiú ceoil óna athair. Sheinn se go poiblí den chéad uair le Jim Keeffe, Pat Cashman agus Seán Lynch ar an ardán damhsa a bhíodh ag crosbhóthar Chnoc na Comhlann.

Tar éis dó seal a chaitheamh ina chónaí san Ísiltír, tháinig sé abhaile agus thosaigh ag seinm ceol beirte leis an bhfidléir Séamus Creagh. Aithnítear an ceirnín a rinne siad le chéile i 1977 ar cheann de na h-albaim ba mhó tionchar sa tréimhse sin.

Bhí Jackie ina bhall de chuid de na grúpaí is cáiliúla ó shin i leith. Chaith sé ceithre bliana ar an mbóthar le De Danann agus sheinn sé le Reel Union agus Arcady. Le Buttons and Bows, thug sé ceol úr ó Cheanada, ó Chríoch Lochlainn agus ó Oileáin Sealtainn isteach sa repertoire agus bíonn sé fós ag taisteal agus ag taifeadadh le Patrick St.

Tá Jackie ina chónaí i Sráid na Cathrach in iarthar an Chláir agus bíonn sé le cloisteáil go rialta ag seisiúin sa cheantar sin.